Kauli aliyotoa Waziri Mkuu, Mizengo Pinda bungeni hivi karibuni haiwezi kupita bila kujadiliwa

 Kwa upande wangu, naamini kwamba haikuwa kauli ya bahati mbaya bali ni ya makusudi na ndiyo maana hatuoni Pinda akiomba radhi au hata Rais akimkosoa au hata chama tawala CCM kiikemea.

Pinda huyu huyu aliyeingia katika nafasi hiyo akiwa mnyenyekevu na kujiita mtoto wa mkulima, sasa anaonyesha sura yake ya pili ya ukatili.

Siyo mara ya kwanza kutoa kauli tata kama hizo, kwani mwaka jana wakati aliyekuwa Mwenyekiti wa Jumuiya ya Madaraktari, Dk Steven Ulimboka akitekwa, Pinda alionyesha kukata tamaa pale aliposema, “liwalo na liwe”.

Huo bila shaka ndiyo msimamo wa chama na Serikali, kwamba mtu akitaka kukunyang’anya kitumbua chako yaani madaraka hata kwa sanduku la kura, huyo ni mhalifu. Tena siyo wa kupeleka mahakamani bali kupiga na ikiwezekana kuua kabisa.

Wakati watu wengine wakiitafsiri amani kuwa ni hali ya watu kutosheka kiuchumi na kijamii, wengine wanaona amani ni kundi la watu wachache kufaidi utamu wa nchi bila bugdha. Amani kwa tabaka la viongozi na matajiri ni utamu wao kutoguswa na kundi la wasionacho.

Kundi hilo la wachache limejijengea ngome za kijeshi, yoyote anayetoa mawazo mbadala ni adui, hata kama nchi yetu inafuata mfumo wa demokrasia ya vyama vingi.

Bahati mbaya majeshi yetu yamejengwa katika misingi ya utii, yaani kutii kila mari inayotoka kwa mkubwa. Sasa mkubwa kashawaambia pigeni, tunatarajia nini, ni kipigo kipigo, kipigo.

Ndiyo maana mwanafalsafa wa zamani wa Ujerumani, Karl Marx aliwahi kusema kuwa, katika kila jamii kuna makundi mawili ya walionacho, na wasionacho (ambao ni wengi); ili wasionacho wafanikiwe ni lazima kundi hilo lifanye mapinduzi kwa kundi la walionacho.

Hapa sizungumzii mapinduzi ya kijeshi, ila nchi yetu inahitaji mapinduzi ya kifikra kutoka kwa wasionacho. Ni lazima tabaka la viongozi likubali kukosolewa iwe ni kwa vyombo vya habari, maandamano, mikutano na njia nyinginezo.

Huo ndiyo uhuru unaoweza pia kutumika kuwasifia viongozi hao kama watafanya vizuri.

Kama alivyosema Pinda, nchi yetu inafuata utawala wa sheria, hivyo tufuate utaratibu wa sharia kwa vitendo kwa kuwakamata watuhumiwa wote – wanaotii amri na wakaidi na kuwafikisha mahakamani. Lakini kwa tangazo la Waziri Mkuu Pinda kinachofuata ni kipigo tu, na kipigo si lelemama matokeo yake ni majeruhi na hata vifo.