Mtwara. Mbunge wa Jimbo la Mtwara Mjini (CCM), Hasnein Murji jana aliachiwa baada ya kutimiza masharti yaliyotolewa na mahakama

 

Mbunge wa Mtwara Mjini (CCM), Hasnein Murji (kushoto) akiingia katika chumba cha Mahakama ya Hakimu Mkazi Mkoa wa Mtwara  kusomewa shtaka la kufanya uchochezi. Picha na Haika Kimaro.  

Mtwara. Mbunge wa Jimbo la Mtwara Mjini (CCM), Hasnein Murji jana aliachiwa baada ya kutimiza masharti yaliyotolewa na mahakama na kumwezesha kuwa huru kwa dhamana.

Mbunge huyo alirudishwa rumande juzi kutokana na kushindwa kutimiza masharti. Sharti hilo lilikuwa ni kuwa na hati ya kusafiria ambayo aliiacha Dar es Salaam.

Hakimu Mkazi Mfawidhi Mkoa wa Mtwara, Dynes Lyimo alimwachia mbunge huyo kwa dhamana na hivyo kumtaka mtuhumiwa na mdhamini wake kusaini hati za kumtolea dhamana.

Baada ya maelezo yote, hakimu Lyimo aliahirisha kesi hiyo hadi Julai 4,mwaka huu mahakamani hapo.

Mbunge huyo alifikishwa katika Mahakama ya Hakimu Mkazi mkoani hapa mwishoni mwa wiki akituhumiwa kwa kosa la uchochezi anaodaiwa kuufanya Januari 19, mwaka huu eneo la Ligula mkoani hapa.

Hata hivyo viongozi wengine wa vyama vya siasa vya upinzani wanaohusishwa na vurugu za gesi wanatarajiwa kufikishwa mahakamani kwa mara nyingine kesho kusikiliza kesi inayowakabili yenye makosa matatu.

Viongozi hao ni Katani Ahmed Katani (33) na Said Kulaga (45) wa CUF, Hassan Uledi (35) wa NCCR Mageuzi na Hamza Licheta (51) wa TLP, wote wakazi wa Mtwara.

Mbunge huyo pamoja na wenzake hao wanashtakiwa kwa makosa ya uchochezi yaliyopelekea kufanyika kwa vurugu na kusababisha uvunjivu wa amani na mali za watu pamoja na miundombinu kuharibiwa vibaya.