Dar es Salaam. Hatima ya Chama Cha Demokrasia na Maendeleo (Chadema), kuendelea kushiriki au kutoshiriki kwenye mchakato wa Mabadiliko ya Katiba Mpya itajulikana baada ya kikao cha Kamati Kuu ya chama hicho.

Kamati hiyo inatarajiwa kukutana katika vikao vyake vya kawaida vya kila baada ya miezi mitatu kujadili majibu ya Serikali yaliyotolewa bungeni na Waziri Mkuu Mizengo Pinda na yale ya Mwenyekiti wa Tume ya Mabadiliko ya Katiba Mpya, Jaji Mstaafu Joseph Warioba hivi karibuni.

Katibu Mkuu wa Chadema, Dk Wilbrod Slaa alisema jana kwamba hawawezi kukurupuka kufanya uamuzi wa kujitoa na kuuacha mchakato huo ukatawaliwa na CCM jambo ambalo litasababisha kupata Katiba isiyokuwa na mashiko kwa mustakabali wa taifa.

Alisema tamko alilolitoa Mwenyekiti wa chama hicho, Freeman Mbowe bungeni hivi karibuni ilikuwa ni uamuzi wa Kamati Kuu hivyo na Serikali pamoja na Tume imejibu kwa kiwango chake.

“Mbowe alitoa tamko linalotokana na maagizo ya Kamati Kuu. Hayakuwa maagizo ya Mbowe .Chadema hata siku moja haitoi na kabla ya siku ya mwisho Warioba alitoa jibu hakututaja lakini alikuwa anajibu hoja zetu,Waziri Mkuu ndani ya Bunge katoa jibu,”alisema.

“Chadema haikurupuki tena, tumeshapata aina gani ya majibu. Kinachofuata tunarudi kwenye Kamati Kuu tunawaambia haya ndiyo majibu ya Warioba haya ndiyo majibu ya Pinda bungeni, tuendelee au tusiendelee, tukiendelea utaratibu wa kujitoa uweje.”

Dk Slaa alisema vikao vya Chadema vinaitishwa kikatiba, lakini kutokana na rasimu ya Mabadiliko ya Katiba kutolewa mwezi huu kulingana na ratiba wataweza kujadili mambo yote.

Akifafanua kuhusu Mjumbe wa Kamati ya Mabadiliko ya Katiba Mpya ambaye ni mwakilishi wa chama hicho,Profesa Mwesiga Baregu alisema endapo Chadema kitajitoa kisheria mjumbe huyo atakuwa amejitoa kwani atakuwa hana anayemwakilisha.

“Tutapigania mpaka Katiba ya wananchi ipatikane, ibara ya 8 inasema Serikali itapata mamlaka yake kutoka kwa wananchi, lakini hivi sasa wananchi wamegeuzwa watumwa.Tunataka Katiba ambayo wananchi wanaisimamia Serikali yao tofauti na ilivyo sasa,”alisema Dk Slaa.

Aprili 30 mwaka huu,Jaji Warioba aliwataka wanasiasa kuacha tabia ya kutaka kuhodhi mjadala wa Katiba Mpya na badala yake waheshimu uhuru wa makundi yote ya wananchi kuchangia Katiba Mpya.

Alisema wao kama tume hawawezi kufanya kazi kwa shinikizo la wanasiasa bali watafuata mwongozo.

uliopo ambao utaisaidia nchi kupata Katiba ya Watanzania na si matakwa ya vikundi.

“Tusipoondokana na suala la kujiweka vipandevipande hatutapata Katiba Mpya na wala kufikia mwafaka, ni lazima tufanye uamuzi mgumu ili tupate Katiba Mpya,”alisema Jaji Warioba.

Katika hatua nyingine, aliyekuwa msaidizi wa Mbunge wa Iramba Magharibi (CCM) Mwigulu Nchemba, Ntundu Emmanuel amehamia Chadema na kukabidhiwa kadi na Dk Slaa.