BUNDI ATUA HALMASHAURI YA WILAYA YA USHETU

Na Antony Sollo Ushetu.

MGOGORO mkubwa umeibuka baina ya Emmanuel Makashi ambaye ni Diwani wa Kata na Christopher Rwagasanga Lyogelo ambaye ni Afisa Mtendaji wa Kata ya Sabasabini iliyopo katika Halmashauri ya Wilaya ya Ushetu Mkoni Shinyanga,hali iliyopelekea diwani huyo kuangua kilio katika kikao cha baraza la Madiwani wa Halmashauri hiyo akimtuhumu Afisa mtendaji huyo kuhujumu shughuli za maendeleo ya Kata yake.

Akiwasilisha malalamiko yake mbele ya baraza la Madiwani kilichofanyika Februali 14 mwaka huu huko Ushetu Makashi lisema kuwa Afisa Mtendaji huyo amekuwa akibeza kila kitu kinachofanywa na Diwani huyo.

“Mheshimiwa mwenyekiti Afisa Mtendaji huyu amekuwa akinichonganisha na wananchi huku akisema kwamba mimi sijasoma,na kuwaambia kuwa yeye ndiye anafaa kuwa kiongozi wao akidai kuwa anashahada ya elimu ya juu huku akiwaambia kwamba mimi sina uwezo wa kuwaletea maendeleo,amekuwa akiwashawishi watendaji wa vijiji kutojishughulisha katika masuala mbalimbali ikiwemo uchangiaji wa shughuli za maendeleo”alisema Makashi.

Kutokana na uchungu aliokuwa nao Makashi aliangua kilio mbele ya viongozi mbalimbali waliohudhuria kikao cha baraza la Madiwani wa Halmashauri hiyo kilichoketi kwa lengo la kujadili mambo mbalimbali ya maendeleo ikiwamo miradi ya maendeleo kwa wananchi wa Ushetu.

Baraza hilo lilihudhuriwa na viongozi mbambli mbali wa Chama na serikali akiwemo mwenyekiti wa CCM Mkoa wa Shinyanga Mabala Mlolwa pamoja na katibu Tawala wa Wilaya ya Kahama, Timoth Ndanya ambapo Diwani huyo aliamua kumshtaki Mtendaji huyo kwa Mwenyekiti wa CCM Mkoa wa Shinyanga huku akisema.

“Ndugu mwenyekiti kuna tatizo la kiutendaji katika Kata yangu ya Sabasabini kwamba, Afisa Mtendaji wa Kata amekuwa kikwazo kikubwa cha maendeleo kwa wananchi wangu, tangu aanze kazi kwenye Kata yangu mwaka 2016 hakuna maendeleo yoyote kwani amekuwa akiwagomesha wananchi kuchangia shughuli za maendeleo,” alilalamika Makashi.

Katika jitihada za kutatua mgogoro huo Makashi alimuomba Mkurugenzi Mtendaji wa Halmashauri hiyo Matomola Michael kufika katika Kata hiyo kwa lengo la kuwapatanisha waendelee kuwatumikia wananchi huku akisema tangu kuanza kwa figisu figisu za Afisa Mtendaji huyo hadi sasa hakuna kitu kinachofanyika kutokana na mgogoro huo.

“Mheshimiwa mwenyekiti kibaya zaidi Afisa Mtendaji huyo amekuwa akiwashawishi na watendaji wengine wa vijiji wasinipe ushirikiano katika kutekeleza shughuli za maendeleo kwa wananchi kwa madai kwamba yeye ndiye kiongozi sahihi kutokana na kwamba ana nashahada ya elimu ya juu,kwa kweli nakuomba Mkurugenzi uunde tume ya uchunguzi dhidi yake,kama hutafanya hivyo tubadilishane ofisi wewe uwe diwani na mimi nikae kwenye kiti chako cha ukurugenzi ili uone vitendo ninavyofanyiwa na Mtendaji huyo,” alisema Makashi kwa uchungu.

Makashi alisema kuwa,kabla ya ujio wa Afisa Mtendaji huyo katika Kata ya sabasabini, kulikuwa na mahusiano mazuri na  wananchi kutokana na ushirikiano mzuri kati yake na kaimu afisa mtendaji aliyekuwapo kipindi cha 2013 /2015 ambapo walifanikisha kutimiza agizo la Rais Magufuli juu ya kutengeneza Madawati mashuleni kwa kuchonga madawati 74 yaliyogharimu kiasi cha shilingi milioni 8.8

Makashi alisema kuwa katika kipindi hicho alijitolea katika ujenzi wa matundu ya choo cha shule kwa kuchangia fedha kiasi cha shilingi 150,000 na kuongeza kuwa kiasi cha shilingi milioni 5.3 kilitumika kujenga nyumba ya mganga  katika Zahanati ya Kata huku nguvu ya wananchi ni shilingi milioni 1.2.

Makashi alibainisha kuwa katika kipindi cha mwaka 2017 alifanikisha ujenzi wa barabara ya Sabasabini kwenda Iponyang’holo kwa kiwango cha changarawe yenye urefu wa kilometa 9 kwa gharama ya shilingi milioni 2.5 kwa ushirikiano na diwani wake wa viti maalum Felista Nyerere ambaye alichanga shilingi 300,000 kati ya fedha hizo,na sasa Afisa mtendaji huyo ameathiri shughuli za maendeleo katika Kata hiyo kutokana na mgogoro walio nao.

“Mtendaji huyo alianza kazi katika kata hii tangu mwaka 2016, na alinikuta nikiwa vizuri na wananchi wangu  lakini tangu aanze kazi nimeshindwa kumuelewa labda anaitaka hii nafasi ya Udiwani wa Kata! , maana anachofanya Mtendaji huyu ni uvunjaji wa Katiba ya Jamhuri ya Muungano na ninaona anapingana Mheshimiwa Rais baada ya kuamua kuamua kukwamisha shughuli za maendeleo kwa makusudi kinyume na agizo la Rais la kuwatumikia wananchi!,mimi naomba Mkurugenzi aunde Tume ili kuweza kutatua mgogoro huu vinginevyo Kata hii haitaweza kupata maendeleo”alisema Makashi.

Akichangia hoja hiyo Diwani wa Kata ya Bulungwa Joseph Masaluta alilieleza baraza hilo kuwa wote wawili Diwani pamoja na Afisa mtendaji huyo wa Kata wapelekwe kwenye kamati ya maadili kwa lengo la kuhojiwa kwa kina ili kubaini chanzo cha mgogoro wao na kuongeza kuwa wawili hao wamekutana wote ni jeuri.

Katika majibu yake kwa diwani huyo Makamu mwenyekiti wa baraza hilo Gagi Lala ambaye ndiye alikuwa akiongoza baraza hilo alisema,

“Mkurugenzi haiwezekani mtu alalamike kiasi hiki tena hadharani inaonekana kuna tatizo linalopaswa kushughulikiwa, pamoja na kwamba kanuni za baraza haziruhusu kuingiza taarifa zilizo nje ya shughuli za baraza , mheshimiwa diwani ujumbe umefika kuwa mtulivu tutalishughulikia suala hili,” alisema Lala.

Tanzania Daima lilimtafuta Afisa Mtendaji wa Kata ya Sabasabini Christopher Rwagasanga Lyogelo kupitia simu zake mbili za mkononi 0687 937 103 na 0765 192 263 ili kuzungumzia tuhuma hizo lakini simu zilizimwa hivyo juhudi za kumpata ali kutolea ufafanuzi wa tuhuma hizo zinaendelea, hata hivyo Afisa kilimo Kata hiyo Rwegasira Thobias ambaye pia amekuwa akikaimu nafasi hiyo mara kwa mara ambaye alikiri kuwepo kwa mgogoro wa viongozi hao na kusema, “Ni kweli viongozi hao wamekuwa na mvutano lakini kama unavyojua siasa na utaalamu haviendani sasa sijui watamalizaje maana kila mmoja anavutia upande wake” alisema Rwegasira

Kwa upande wake kaimu Mkurugenzi Mtendaji wa Halmashauri ya Wilaya ya Ushetu Benjamin Onesmo ambaye pia ni afisa maendeleo ya jamii katika Halmashauri hiyo alisema kuwa kutokana na hali hiyo ofisi yake imelichukua suala hilo na italitafutia ufumbuzi wa haraka.

“Mheshimiwa Mwenyekiti ofisi yangu inalibeba suala hilo na litashughulikiwa na kupatiwa ufumbuzi wa Haraka,” alisema Onesmo”.

MWISHO.