Kutoka Chadema:· Watanzania wawezeshwe kushiriki fursa za soko la pamoja la EAC na sio kuwazuia

 John Mrema-Mkurugenzi wa Bunge na Halimashauri

CHADEMA .

·         Mkuu wa Mkoa wa Kilimanjaro aache kuvuruga Jumuiya ya Afrika Mashariki

·         Watanzania wawezeshwe kushiriki fursa za soko la pamoja la EAC na sio kuwazuia

·         Kampuni ya “Kilimanjaro Uchumi Company” isiwe na hodhi ya kuuza mahindi Kenya.

Kwa mujibu wa vyombo vya habari vya Jana tarehe 12.11.2013 ziliandikwa taarifa za “Madereva wa Malori kugoma na shehena za nafaka kukwama”  katika mpaka wa Tanzania na Kenya eneo la Holili kutokana na mpango wa Mkuu wa Mkoa wa Kilimanjaro wa kuzuia wafanyabiashara kutoka Tanzania kwenda kuuza mahindi Kenya na badala yake kuwataka waishie kwenye soko la Himo , huku akiruhusu Kampuni moja ya ‘Kilimanjaro Uchumi Company’ kuwa na hodhi ya kusafirisha mahindi hayo kutoka Himo kwenda Kenya .

Agizo hili la Mkuu wa mkoa kama alivyonukuliwa na vyombo vya habari alisema kuwa “sisi tumesema wale wote wenye vibali vya kuleta mahindi na mazao mengine wayauze soko la Himo halafu wafanyabiashara wa Kenya ndiyo wayanunue hapo na kupeleka kwao Kenya”.

Agizo hili la mkuu wa Mkoa linaenda kinyume na agizo la Rais Kikwete alilolitoa wakati akiwa kwenye ziara ya Kiserikali katika mkoa wa Njombe kuwa ni ruksa wafanyabiashara wa Tanzania kusafirisha nafaka nje ya nchi .

Aidha, katika wakati huu ambao tuko kwenye kutafuta mtangamano mzuri baina ya nchi yetu na nchi wanachama wa EAC na wakati ambao tunaelekea kuwa na itifaki ya soko la pamoja , sio busara hata kidogo kuwanyima fursa watanzania kuweza kunufaika na masoko yaliyopo kwenye nchi za Jumuiya ya EAC kwani hali hiyo itaendeleza utamaduni wa kuwafanya watanzania kuwa nyuma ukilinganisha na wafanyabiashara wa nchi nyingine

Hivyo basi, tunaitaka serikali kuchukua hatua zifuatazo ;

i.             Kuondoa mara moja zuio la Mkuu wa Mkoa wa Kilimanjaro la kuwazuia wafanyabiashara wazawa kusafirisha mahindi yao mpaka kwenye soko la Kenya

ii.            Serikali imchukulie hatua stahiki mkuu wa Mkoa kwa kwenda kinyume na agizo la Rais ,na hasa kwa wakati huu ambao taifa lipo kwenye mkakati wa kuondoa mapungufu yaliyojitokeza katika kutekeleza maazimio mbalimbali vya Jumuiya ya Afrika Mashariki.

iii.           Kuondoa hodhi kwa kampuni ya ‘Kilimanjaro Uchumi Company ltd’ ya kusafirisha mahindi kutoka Soko la Himo hadi Kenya na badala yake uchunguzi ufanywe dhidi ya baadhi ya wamiliki wa kampuni hii kama wameshalipa deni la Halimashauri ya Wilaya ya Moshi kiasi cha shilingi milioni 106 walilokuwa wanadaiwa kupitia kampuni ya “Mafubilo Trading Company”

iv.          Pawepo na jitihada za makusudi za kuwawezesha wafanyabiashara wa kitanzania kupata mitaji na mikopo nafuu ili waweze kushindana na wale wa nchi jirani ili kuwawezesha kujiandaa kikamilifu kuingia kwenye itifaki ya soko la pamoja la EAC.

Limetolewa na ;

…………………

John Mrema

Mkurugenzi wa Bunge na Halimashauri

CHADEMA .