MAAFA MAKUBWA YATOKEA UFILIPINO KUFUATIA KUKUMBWA NA KIMBUNGA HAIYAN

Madhara ya kimbunga Haiyan Ufilipino

Marekani imepeleka ndege na meli za mizigo kwenda Ufilipino, wakati ambapo Uingereza imepeleka meli ya kivita.

Watu wapatao 10,000 wanahofiwa kufa, na maelfu ya walionusurika katika kimbunga Haiyan wanahitaji msaada.

Rais wa Ufilipino Benigno Aquino ametangaza hali hiyo kuwa janga la kitaifa.

Katika taarifa yake, Rais Aquino,amesema majimbo mawili ya Leyte na Samar yameathirika zaidi kutokana na kimbunga hicho, ikiwemo watu wengi kupoteza maisha.

Juhudi kubwa za kimataifa zinafanyika ili kutoa msaada wa dharura kwa Ufilipino, lakini wafanyakazi wa mashirika ya kutoa msaada wanakwama kuyafikia maeneo yaliyokumbwa na kimbunga.

Katibu Mkuu wa Umoja wa Mataifa, Ban Ki-moon amezielezea picha zinazoonyesha ya kimbunga hicho kuwa zinatisha na kukatisha tamaa.

Umoja wa Mataifa utazindua mpango mkubwa wa msaada wa kibinadamu, na kutenga dola milioni 25 kusaidia jitihada za misaada ya dharura.

"Maelfu ya watu wameripotiwa kufa na watu wapatao milioni kumi wameathirika kutokana na kimbunga hicho. Hebu tuonyeshe mshikamano wetu na watu wa Ufilipino katika kipindi hiki cha kuhitaji msaada," amesema.
Habari na BBCSwahili.com