Mmoja wa majeruhi katika shambulizi la risasi lililotokea Ilala Bungoni, Dar es Salaam juzi, Rubani Francis Shumila amefariki dunia jana katika Taasisi ya Tiba ya Mifupa Muhimbili (Moi), alikokuwa akitibiwa.

 

Polisi wakikagua gari walilokuwa wakisafiria watu wanne kabla ya kushambuliwa kwa risasi na mtu alitajwa kuwa jina la Gabriel Munisi aliyedaiwa kuua watu wawili na yeye kujiua baada ya kujeruhi wengine jana asubuhi jirani na Club ya Wazee, Ilala, jijini Dar es Salaam. 

Wakati hilo likitokea, mama mzazi wa Christine Alfred, binti anayedaiwa kuwa chanzo cha shambulizi hilo, Hellen Alfred amekana kutambua uchumba baina ya marehemu Gabriel Munisi na mtoto wake huku kaka wa marehemu huyo akieleza kwamba alitambulishwa na mdogo wake, kwa binti huyo kwamba ni mchumba wake.

Katika shambulizi hilo, Munisi anadaiwa kuwashambulia marehemu Shumila, Hellen, Christine na mdogo wake Alpha ambaye alifariki dunia papo hapo katika shambulizi hili linaloelezwa kuwa lilitokana na wivu wa mapenzi. Baada ya shambulizi hilo, Munisi naye alijiua kwa kujipiga risasi kichwani.

Ofisa Uhusiano wa taasisi hiyo, Patrick Mvungi alisema jana kwamba Shumila alifariki dunia saa 12.40 asubuhi akiwa katika Chumba cha Wagonjwa wanaohitaji Uangalizi Maalumu (ICU).

Hellen amelazwa katika Hospitali ya Taifa Muhimbili (MNH) na hali yake inaendelea vizuri na Christine aliruhusiwa kutoka hospitali juzi hiyo hiyo.

Taarifa ya daktari

Mvungi alisema kuwa taarifa za awali za daktari zinaonyesha kwamba Shumila alipoteza damu nyingi kutokana na majeraha ya kupigwa risasi tatu.

Alisema alipigwa risasi kichwani, mkononi na tumboni.

Ndugu zake Shumila ambao walibainika wanatoka Kenya waligoma kuzungumza lolote kuhusu tukio hilo.

Ofisa wa Ubalozi wa Kenya nchini alisema jana kwamba wamesikia taarifa hizo kwenye vyombo vya habari lakini akasema ni mapema kulizungumzia.

Utata wa uhusiano

Ofisa Uhusiano wa MNH, Jacqueline Msuya alisema kuwa amezungumza na mama yake Christine ambaye alimweleza kwamba anatambua kwamba Shumila na mwanaye anayesoma huko Cyprus walikuwa wachumba na kusema kwamba binti yake huyo aliwahi kumwambia kwamba Munisi alikuwa rafiki yake wa kawaida tu

Hata hivyo, maelezo hayo yanatofautiana na yale ya Kaka wa Munisi, Edward Mgaya ambaye alisema jana kwamba marehemu Munisi alimtambulisha kwa Christine Juni mwaka huu kuwa ni mchumba wake na kwamba kabla ya hapo hakuwahi kufanya hivyo kwa msichana mwingine yeyote.

“Naamini Christina ndiye alikuwa chaguo lake, lakini sielewi ni jambo gani limejitokeza kati yao. Mdogo wangu hakuwahi kunilalamikia juu ya uhusiano wao,” alisema Mgaya huku akitiririkwa na machozi na kuongeza:

“Gabriel alikuwa na miaka 31 na wa tatu katika familia yetu. Alijishughulisha na kuuza magari ambayo aliyachukua hapa Dar es Salaam na kuyasafirisha hadi Mwanza.”

Mgaya alisema mazishi ya Munisi yamepangwa kufanyika kesho katika Kijiji cha Masama mkoani Kilimanjaro.

Hali ya Christine

Christine, ambaye alijeruhiwa miguuni, aliruhusiwa kurudi nyumbani juzi baada ya kufikishwa Hospitali ya Ilala Amana.

Mmoja wa wanafamilia ambaye alikataa kutaja jina lake, alisema ndugu yao kwa sasa anapatiwa matibabu kwenye Hospitali ya Regency lakini hajalazwa.

Taarifa zaidi zinaeleza kuwa familia ya Christine na ile ya Shumila walikuwa wamepanga kukutana jana kwa pamoja na kuandaa mipango ya mazishi ya Alpha na Shumila.

Polisi yashtuka

Jeshi la Polisi limesema litaanzisha operesheni kuwabaini baadhi ya watu waliomilikishwa silaha kihalali huku wakitumia silaha hizo kinyume na malengo.

Taarifa ya iliyotolewa jana na Msemaji wa Polisi, Advera Senso ilisema watakaobainika kutumia silaha kinyume cha taratibu zilizowekwa, watachukuliwa hatua ikiwa ni pamoja na kuwanyang’anya.

“Katika siku za hivi karibuni, imebainika kuwa, baadhi ya watu wamekuwa wakitoa vitisho kwa wananchi kwa kutumia silaha hizo bila sababu za msingi wanapokuwa katika maeneo mbalimbali, kama vile kwenye baa, kumbi za starehe na hata kulipizana visasi, jambo ambalo ni kinyume cha sheria na malengo ya umilikishwaji.”